Les på bokmål her>>>

Det nærmar seg slutten av eit skuleår. Alle elevane står overfor store eller små endringar og overgangar. Overgang til nytt trinn, ny klasse, ny skule, ungdomsskule eller vidaregåande skule. Mange barn opplever desse overgangane som vanskelege og dei kan være ekstra sårbare no. Det er ekstra viktig at dei føresette er engasjerte  i denne fasen.

Alle overgangar og miljøendringar medfører usikkerheit i større eller mindre grad. Å takle endringar er ein eigenskap som må lærast. Som vaksne har vi mange erfaringar og høg kompetanse på dette feltet.  No er det viktig at vi er til stades og blir med barna våre vidare.

På nettstaden til Mentalhelse.no kan vi lese at dei kvart år mottek opp til 5.000-6.000 meldingar frå barn og unge.  Dei ser at for barn og unge kan livet ofte være prega av endringar og overgangar. Og for ein del unge kan det sjå ut som om enkelte problem startar i samband med ein vanskeleg overgangsfase.

Frå barneskule til ungdomsskule

Overgangen frå barnetrinnet til ungdomstrinnet kan vere utfordrande å handtere for mange elevar. Her vil dei møte nye læringsmiljø, nye lærarar og nye forventningar. Vidare er overgangen kjenneteikna av at elevane i ungdomsskulen for første gong får erfaring med formell vurdering med karakter.

Fra ungdomsskule til vidaregåande

For mange er møtet med ein ny skule og eit nytt miljø utfordrande. Undersøkingar viser at bortimot ein fjerdedel av dei elevane som sluttar i vidaregåande opplæring, sluttar i løpet av det første skuleåret. Også høgt fråvære og svake karakterar har stor effekt på sannsynet  for å slutte. Overgangen til vidaregåande skule gir eleven enda høgare grad av fridom og ansvar. Ikkje alle forvaltar dette til sitt eige beste.

Kva kan vi gjere?

Å vere til stades og støtte er viktigare enn nokon gong. Barnet skal føle at det ikkje er åleine: Endringa angår heile familien.

·         Kunnskap er tryggleik. Gå igjennom i lag all informasjon de har om det nye læringsmiljøet.

·         Tryggleik er svar. Er det noko de lurer på, så er det lov å ta ein telefon og spørje.

·         Snakk om usikkerheita. Kva fryktar du? Kor stor muligheit er det for at dette vil skje?

·          Fokuser på det positive. Fortel gode historier frå dine eigne overgangar. Snakk positivt med venner og foreldra deira.

«Evna til å takle forandring og tap styrkes dersom vi forstår at endring er en vesentlig del av livet, og noe som kan ha både positive og negative følger». (Organisasjonen Voksne for Barn)

Overgangen er ikkje slutt i august

Vi kan karakterisere ein overgang som vellukka når barnet har funnet seg til rette, føler seg trygg og arbeider godt. Det tar tid å finne plass sin og å innarbeide nye rutinar i eit nytt miljø. Sørg for at det blir tilrettelagt for den nye kvardagen også i heimen. Gode rutinar i heimen betyr mykje.